नमूना विद्यालयमा अ’नियमितता, हिसाबकिताब खाजेपछि विद्यालय आउनै छाडे प्रधानाध्यापक

सिरहा । श्री जनता नमूना माध्यमिक विद्यालय (प्राविधिक घार) सखुवानन्कारकट्टी–१ मौवाहीमा व्यापक अनियमितता भएको गुनासो अभिभावकहरुले गरेका छन् । विद्यालयका प्रधानाध्यापक रामप्रित यादवले विद्यालयको पूर्वाधार निर्माण तथा शैक्षिक सामग्री खरिदमा अनियमितता गरेको विद्यालय व्यवस्थापन समितिसहित अभिभावकहरुको आरोप छ ।

नमूना विद्यालयको लागि पूर्वाधार निर्माण तथा शैक्षिक सामग्री व्यवस्थापन शीर्षकमा आव ०७५/७६ मा छुट्याइएको एक करोड ५० लाख रुपैयाँमा व्यापक अनियमितता भएको स्थानीयको आरोप छ । सो रकमध्ये ९७ लाख रुपैयाँको चार कोठे भवन निर्माण गर्ने भनिए पनि अझै पुरा नभएको विद्यालय व्यवस्थापन समितिका वरिष्ठ सदस्य समेत रहेका बालेश्वर यादवले जानकारी दिए ।

बाँकी रकम शैक्षिक सामग्री खरिदका लागि दिएको भनिए पनि कुनै सामग्री खरिद नगरी रकम निकासा गरेको उनले सुनाए । व्यवस्थापन समिति र अभिभावकलाई जानकारी नै नगराई काम गरेपछि स्थानीयले सोधखोज सुरु गरेका थिए । सोधखोजपछि विद्यालयमा व्यापक अनियमितता भएको खुलेको स्थानीयको भनाइ छ ।

आर्थिक अनियमिताबारे छानविन गर्न विद्यालय व्यवस्थापन समितिका सदस्यहरु र अभिभावकहरुको माग छ । अनियमिततामा संलग्नमाथि कडा कारवाही हुनुपर्नेमा उनीहरुले जोड दिएका छन् ।

आर्थिक वर्ष २०७६÷७७ मा पनि विद्यालय सुधार गुरुयोजना अन्तर्गत १ करोड ५० लाख रकम आएको थियो । तर उक्त रकम प्रधानाध्यापकले काम विना नै निकासा गरेको स्थानीय अगुवा दिपेश यादवले जनाए । स्थानीयले गाउँपालिका, शिक्षा समन्वय समिति र केन्द्रसम्म पुगेर खोजतलास सुरु गरेपछि प्रधानाध्यापकले पछिल्लो एक महिनाबाट बल्ल काम थालेका छन् ।

०६८÷६९ देखि हालसम्मको विद्यार्थीबाट उठाएको शुल्क र विभिन्न निकायबाट उठाएको करिब १० करोडको आर्थिक पारदर्शिता गरिदिन प्राधानाध्यापक रामपृत यादवसँग माग गरेको जनता समाजवादी पार्टीका नेता समेत रहेका दिपेश यादवले बताए ।

विद्यालयको निर्माणको हरेक सामग्री, निर्माण मिस्त्री तथा मजदुर सबै प्रधानाध्यापक आफैले ल्याउने र काम लगाउने गरेपछि मिलेमतोको आशंकामा हिसाब किताब माग गरिएको, त्यसपछि प्रधानाध्यापक यादव विद्यालय आउनै छाडेको अभिभावकहरु बताउँछन् ।

प्रधानाध्यापक यादवले निर्माण बाहेक कम्प्युटर खरिद, ल्याब व्यवस्थापन, दिवा खाजाका लागि आएका रकमहरु पनि दुरुपयोग गरेको स्थानीयको आरोप छ ।

विद्यालयको कम्प्यूटर ल्याब व्यवस्थापन तथा खरिदका लागि २०७३÷७४ मा २७ लाख रुपैयाँ निकासा भए पनि एक थान कम्प्युटर खरिद नगरी रकम दुरुपयोग गरेको विद्यालय व्यवस्थापन समितिक अर्का सदस्य रामजी यादवले सुनाए ।

उनले भने, ‘त्यसबेला विभागबाट आएको २७ लाख रुपैयाँ प्रधानाध्यापकले निजी काममा प्रयोग गरे, अहिले गाउँपालिकाले दिएको रकमले कम्प्युटर खरिद गरिएको छ । यसैलाई दुवैतिर देखाएर रकम झ्वाम पारेका हुन् ।’

प्रधानाध्यापक यादव भने सबै काम समितिमार्फत नै भएको दावी गर्छन् । उनले कुनै अनियमिता नभएको बताए । समितिको विवरणसहित कुन शीर्षकमा कति रकम आएको र कहाँ खर्च भएको हो भनी बुझ्न खोज्दा उनले आफू बिरामी परेर अस्पतालमा रहेको भन्दै पन्छिए ।

यता, गाउँपालिकाले विद्यालयमा निर्माण तथा शैक्षिक सामाग्री खरिदका लागि आएको रकम विद्यालयको खातामा पठाइदिएको र त्यहीँबाट सबै काम हुने गरेको जनाएको छ । गाउँपालिका अध्यक्ष केदारनाथ यादवले भने, ‘केही कमजोरी भएको भन्ने सुनेको छु, यस विषयमा खोजविन हुन्छ ।’

उक्त विद्यालयलाई प्रदेश सरकारले नमूना विद्यालय घोषणा गरेको छ । नमूना भएपछि आएको डेढ करोड रुपैयाँ पनि दुरुपयोग भएको अभिभावकहरुको भनाइ छ ।

नमूना घोषणा भएपछि आएको डेढ करोड बजेटमध्ये ६५ प्रतिशत पूर्वाधारमा, २५ प्रतिशत शैक्षिक गतिविधिमा र १० प्रतिशत रकम व्यवस्थानमा खर्च गर्नुपर्ने हुन्छ । तर, मापदण्ड बमोजिम प्रधानाध्यापकले खर्च नगरेको सरोकारवालाहरु बताउँछन् । अहिलेसम्म विद्यालयमा शौचालयको राम्रो प्रवन्धसमेत हुन नसकेको विद्यार्थी एवं अभिभावकको गुनासो छ ।-रातोपाटी

Be the first to comment

Leave a Reply

Your email address will not be published.