प्रदेश १ का सामाजिक विकास मन्त्री जीवन घिमिरे कोरोनामुक्त

विराटगनर : प्रदेश १ का सामाजिक विकास मन्त्री जीवन घिमिरे सरकारी निवासबाटै कोरोना जित्न सफल भएका छन् । कोरोना भाइरसको संक्रमण पुष्टि भएपछि १८ दिनदेखि उनी आफ्नै सरकारी क्वार्टरमा आइसोलेसनमा बसेका थिए ।

मन्त्री घिमिरेलाई भदौ १५ गते संक्रमण पुष्टि भएको थियो । संक्रमण पुष्टि भएका उनको रिपोर्ट बिहीबार बिहान नेगेटिभ आएको प्रदेश जनस्वास्थ्य प्रयोगशाला विराटनगरले जनाएको छ । बुधबार उनको स्वाब संकलन गरेर तेस्रो पटक पीसीआर परीक्षणका लागि पठाइएको थियो ।

तेस्रो पीसीआर परीक्षण रिपोर्ट नेगेटिभ आएसँगै संक्रमण पुष्टि भएको १८ दिनपछि उनी कोरोना मुक्त भएका हुन् । कोरोनासँग मिल्ने लक्षण देखिएपछि उनी भदौ १३ गतेदेखि नै होम आइसोलेसनमा बसेका थिए ।

यसअघि भदौ २६ गते गरिएको दोस्रो परीक्षणमा उनको रिपोर्ट पुनः पोजिटिभ आएको थियो । मन्त्री घिमिरेलाई कोरोना पुष्टि भइसकेपछि सामान्य रुघा, खोकीबाहेक स्वास्थ्यमा थप समस्या नदेखिएको उनको सचिवालयले जनाएको छ ।

धनकुटा अस्पतालको निरीक्षणमा गएर फर्किएपछि मन्त्री घिमिरेमा सुरुमा झाडापखाला र ज्वरोको समस्या देखिएको थियो । मन्त्री घिमिरेमा संक्रमण पुष्टि भए पनि उनको परिवारका सदस्य र सचिवालयका कर्मचारीको रिपोर्ट नेगेटिभ आएको छ । केही समयदेखि घिमिरेको सम्पर्कमै नरहेका स्वकीय सचिव राम पोख्रेलको रिपोर्ट भने पोजिटिभ आएको छ । -किशोर बुढाथोकी/अन्नपूर्ण पोष्टबाट

12 Comments

Leave a Reply

Your email address will not be published.