बाँकेमा आइसोलेसनबाट एक काेराेना संक्रमित फरार, खोजीकार्य तीब्र

भगतराम थारु

नेपालगञ्ज, २७ जेठ । बाँकेमा आइसोलेसनबाटै कोरोना संक्रमित फरार भएका छन् । बाँकेको एक आइसोलेशन सेन्टरमा बस्दै आएका नेपालगञ्जका एक कोरोना संक्रमित व्यक्ति फरार भएका हुन् ।

जानकी गाउँपालिका २ को श्री माध्यमिक विद्यालय जोगागाउँ आइसोलेसन सेन्टरमा बसेका नेपालगञ्ज उपमहानगरपालिका १२ कोरियनपुरका ३५ वर्षीय एक कोरोना संक्रमित सोमबार राति फरार भएको प्रहरीले जनाएको छ ।

४१ जना संक्रमित राखिएको उक्त आइसोलेसनबाट सोमबार राति ती संक्रमित फरार भएको जानकी गाँउपालिका वडा नं. १ का वडाध्यक्ष मोहम्मद रजा राईले जानकारी दिनुभयो ।

जेष्ठ ९ गते क्वारेन्टाइनमा राखिएका ती युवाको कोरोना परीक्षण गर्ने क्रममा जेठ २२ गते संक्रमण पुष्टि भएको थियो । कोरोना संक्रमण देखिएपछि उनलाई जानकी गाँउपालिका वडा नं. २ मा रहेको आइसोलेसन सेन्टरमा राखिएको थियो ।

संक्रमित व्यक्ति फरार भएको जानकारी पाउने बित्तिकै प्रहरी परिचालन गरी उनको तीब्र रुपमा खोजी भइरहेको बाँके प्रहरीले जनाएको छ ।

फरार व्यक्तिसँग सम्पर्क रहेकाहरुको कन्ट्याक्ट ट्रेसिङ गरी सोमवार मात्र १० जनाको स्वाब लिइएको थियो । उनी १ महिना अघि भारतबाट नेपाल आएका थिए ।

यसभन्दा अघि बाँकेको नरैनापुर गाउँपालिकाका १३ जना युवा आइसोलेशनमा ल्याउने क्रममा फरार भएका थिए । उनीहरुलाई फरार भएकै दिन प्रहरीले पक्राउ गरेको थियो ।-न्यूज२४