सं क्रमितसँगै विदेशबाट आएकाहरूकाे तथ्याङ्क संकलन गर्न ट्राभल कम्पनीहरूलाई आग्रह

काठमाडौँ, १७ चैत । नेपाल एशोसिएशन अफ टूर एण्ड ट्राभल एजेन्ट्स (नाट्टा)ले विदेशबाट नेपालमा आई कोरोना सङ्क्रमण देखिएका व्यक्तिसँगै जहाजमा आउने अन्य व्यक्तिको विवरण दिन सम्पूर्ण ट्राभल कम्पनीलाई आग्रह गरेको छ ।

नाट्टाका अध्यक्ष अच्युत गुरागाईँले एक विज्ञप्ति जारी गरी मार्च १७ मा कतार एयरवेज र मार्च २० मा भिस्टारा एयरलाइन्सबाट नेपाल आएका तीन यात्रुमा कोरोना सङ्क्रमण देखिएको भन्दै उक्त एयरलाइन्सबाट आउने अन्य यात्रुको पूर्ण विवरण नाट्टामा उपलब्ध गराउन सबै ट्राभल कम्पनीलाई आग्रह गर्नुभएको हो ।

“विश्वव्यापीरूपमा फैलिँदै गएको कोरोना भाइरसको सम्भावित सङ्क्रमणबाट जोगिनका लागि अन्य यात्रुलाई पहिचान गरी सरकारलाई सहयोग गर्न लागेका हौँ”, अध्यक्ष गुरागाईँले भन्नुभयो । यस विषम परिस्थितिमा राज्यद्वारा जारी गरिएको निर्देशन पालना गर्नु नागरिकको दायित्व रहेको नाट्टाले जनाएको छ ।

नेपालमा पछिल्लाे समय देखिएका काेराेना संक्रमित कतार एयरवेज हुँदै आएकाे र साेसँगै यात्रा गरेकाहरू रहेका छन् । सरकारले पनि उक्त विमानमा आएकाहरूकाे पहिचान गरेर अलग्याउन थालेकाे जनाइएकाे छ ।

कोरोना भाइरसको महामारी बढ्दै गएको अवस्थामा सरकारले चैत ११ गतेदेखि २५ गतेसम्मका लागि लकडाउन गरेकाे छ । लकडाउनको पूर्ण पालना गर्नसमेत नाट्टाले सबैलाई आग्रह गरेको छ ।

नाट्टाले विभिन्न मुलुकबाट भर्खरै नेपाल आएका जोकोहीलाई पनि ‘सेल्फ क्वारेन्टाइन’मा बसेर सङ्क्रमण फैलन नदिन सहयाेग गर्न समेत आग्रह गरेको छ ।

Be the first to comment

Leave a Reply

Your email address will not be published.